KB banki býður íbúðarlán

KB banki býður nú lán til íbúðarkaupa eða endurfjármögnunar eldri lána. Íbúðalán KB banka bera 4,4 prósent fasta vexti og er lánshlutfall á höfuðborgarsvæðinu og á Akureyri áttatíu prósent af verðmæti hinnar veðsettu eignar en sextíu prósent annars staðar á landinu. Lánin eru verðtryggð og bjóðast til 25 eða 40 ára. Ekki er hámark á lánsupphæð umfram fyrrnefnd hlutföll en lánsfjárhæð verður þó aldrei hærri en sem nemur brunabótamati fasteignarinnar. Skilyrði fyrir lánveitingu eru að viðkomandi sé með launareikning hjá bankanum og tvennt af þrennu: greiðslukort, útgjaldadreifingu eða lífeyrissparnað. Forsvarsmenn KB banka segjast geta með þessu boðið húseigendum verulega lækkun á greiðslubyrði. Íbúðalánin séu grundvölluð á aðgengi KB banka að hagstæðu lánsfjármagni í krafti útrásar sinnar á erlendri grundu, og með þeim sé stigið skref í átt að þeirri þróun sem átt hafi sér stað víða annars staðar með minnkandi umsvifum opinberra aðila á fjármálamarkaði.