Bréf Big Food Group féllu

Hlutabréf í bresku verslanakeðjunni Big Food Group, sem Baugur íhugar að kaupa, féllu um 4,25 pens á markaði í gær eða niður í 98,5 pens. Bréfin höfðu hækkað í verði vegna fyrirhugaðra kaupa Baugs á 110 pens fyrir hvern hlut. Yfirtökunefnd þvingaði Big Food Group til að gefa út yfirlýsingu þess efnis að stjórn fyrirtækisins myndi mæla með kaupum Baugs fyrir þá upphæð. Breskir fjármálasérfræðingar spá því að Baugur geti nú lækkað tilboðið sitt og haft er eftir forsvarsmanni Baugs í dagblaðinu Independent að fyrirtækið áskilji sér rétt til að bjóða lægra verð. Verði raunin sú má búast við formlegu tilboði eftir fáeinar vikur.