Skuldirnar lifa

Gjaldþrota menn og aðrir skuldarar geta ekki lengur treyst því að skuldir þeirra fyrnist eftir ákveðinn tíma. Fyrning skulda verður sífellt fátíðari því að í dag er unnið markvisst að því að halda við skuldum einstaklinga og fyrirtækja í gegnum kröfuvakt hjá innheimtufyrirtækjum og rjúfa fyrninguna. Þetta kerfi hefur orðið til þess að reglulega er reynt að innheimta skuldir og fylgst er með því hvort skuldararnir eru borgunarmenn fyrir skuldum sínum. Sigurður Jónsson, framkvæmdastjóri Intrum á Íslandi, telur þetta ekki merki um aukna hörku í kerfinu. Hann kallar þetta merki um aukið siðferði. "Sú breyting er að eiga sér stað í kerfinu í dag að skuldari getur ekki treyst því að kröfurnar á hann týnist þó að hann borgi ekki eins og var kannski hér áður fyrr. Í bankakerfinu var það t.d. þannig að krafan var afskrifuð og fyrntist á ákveðnum tíma og þá gátu menn bara treyst því að það var þannig. En það er ekki lengur þannig. Skuldunum er viðhaldið. Í dag er unnið markvisst að því að færa skuldarann inn á skrá hjá Lánstrausti og þar geta menn verið í fjögur ár á vanskilunum og svo er hægt að halda kröfunum lifandi eftir það," segir Sigurður. Þessi breyting mun hafa verið að eiga sér stað frá 1995 og hefur tækniþróunin átt sinn þátt í að ýta undir hana. "Þetta er eðlilega bara sú uppstokkun sem hefur verið að eiga sér stað í viðskiptalífinu, t.d. með einkavæðingu bankanna og aukinni samkeppni. Hún hefur haft áhrif á það að menn hafa meiri áhuga á að vinna markvisst að því að nýta þessa hluti. Menn þurfa að fara betur með peningana sína, þetta snýst bara um það."