Fjármálaeftirlitið vill upplýsingar um starfslokasamning sjóðsstjóra

Fjármálaeftirlitið hefur óskað eftir upplýsingum um samninga sem fyrrverandi stjórn Sameinaða lífeyrissjóðsins gerði við Jóhannes Siggeirsson, framkvæmdastjóra sjóðsins í maí 2000 og um starfslok hans í febrúar síðastliðnum. Stjórn Sameinaða lífeyrissjóðsins ákvað að óska eftir við fyrrverandi framkvæmdastjóra að hann hætti störfum snemma á árinu 2005 vegna óánægju með ávöxtun sjóðsins. Þá fyrst varð henni ljós viðauki við starfskjarasamning framkvæmdastjórans sem fyrrverandi formaður og varaformaður sjóðsins gengu frá við framkvæmdastjórann á sínum tíma. Núverandi sjóðsstjórn komst að þeirri niðurstöðu að samningur um starfslok framkvæmdastjórans á dögunum yrði að taka mið af gildandi ráðningarsamningi hans ásamt viðaukum og studdist þar við álit lögmanna sem til var leitað. Í tilkynningu frá sjóðsstjórn segir að stjórnin muni að sjálfsögðu veita Fjármálaeftirlitinu allar tiltækar upplýsingar um samninga og starfslok fyrrverandi framkvæmdastjóra. Ennfremur segir að stjórnin telji ekki viðeigandi að hún tjái sig frekar um á málið á meðan um það er fjallað í samskiptum Fjármálaeftirlits og Sameinaða lífeyrissjóðsins. Í ályktun stjórnar Félags járniðnaðarmanna eru starfslok framkvæmdastjóra Sameinaða lífeyrissjóðsins harkalega gagnrýnd. Stjórn Félags járniðnaðarmanna gagnrýnir harðlega að árið 2000 var gerður sérstakur viðauki við ráðningarsamning fyrrverandi framkvæmdastjóra Sameinaða lífeyrissjóðsins þannig að greidd eru full laun í 30 mánuði að meðtöldum uppsagnarfresti. Sérstaklega er gagnrýnt, ef rétt er, að viðaukinn sem gerður var af þáverandi formanni og varaformanni sjóðsins hafi ekki verið lagður fyrir stjórn sjóðsins eða endurskoðanda. Síðar segir orðrétt, "Félagsstjórnin telur brýnt að núverandi stjórn Sameinaða lífeyrissjóðsins kanni ítarlega hvort hægt sé að hnekkja þessum gjörningi og geri grein fyrir niðurstöðum. Einnig að settar verði starfsreglur um meðferð ráðningarsamninga o.fl. sem stjórn sjóðsins ber ábyrgð á og að sjóðsfélögum verði árlega gerð grein fyrir launakjörum framkvæmdastjóra og stjórnarmanna. Félagsstjórn telur jafnframt eðlilegt að óskað verði eftir mati Fjármálaeftirlitsins á gildi ráðningarsamningsins og hvort rétt hafi verið að honum staðið."