Almenningur ekki einn um sérkjör

Hópurinn sem Almenningur ehf. gerði samning við vegna kaupa á Símanum er ekki sá eini sem mun bjóða íslenskum almenningi sérkjör. Fleiri ætla að bjóða almenningi að minnsta kosti sömu kjör þótt Agnes Bragadóttir og Orri Vigfússon hafi ekki gert samkomulag við þá. Almenningur ehf. hefur gert samning við einn hóp fjárfesta um að almennir íslenskir borgarar fái færi á að kaupa samtals 30 prósenta hlut í Símanum innan hálfs árs frá sölu hans, hreppi sá hópur hnossið. Fréttastofan hefur heimildir fyrir því að annar hópur sem gert hefur tilboð í Símann ætli að bjóða hinum almenna borgara ekki síðri samning en Almenningur ehf. hefur gert við sinn hóp. En hverju hefur Almenningur ehf. með Agnesi Bragadóttur og Orra Vigfússon í fararbroddi náð fram umfram það sem er í útboðsskilmálum um söluna? Jafet Ólafsson hjá Verðbréfastofunni segir að biðtími almennings eftir að fá að kaupa í Símanum hafi styst mikið og búið sé að tryggja að kaupverðið á hlut verði það sama og kaupendur Símans fá hann á. Í útboðsskilmálum frá framkvæmdanefnd um einkavæðingu var tryggt að hinum almenna borgara yrði boðinn til kaups 30 prósenta hlutur í Símanum innan tveggja ára. Tvö ár eru hins vegar langur tími í viðskiptum og þykir því betra ef hluturinn sem almenningi býðst kemur fyrr á markað. Þá þykir einnig gott að hluturinn verði seldur á sambærilegu verði og fjárfestarnir kaupa á. En er fullnaðarsigur unnin eins og Agnes Bragadóttir orðaði það? Jafet segist mundu kalla þetta áfangasigur vegna þess að menn viti ekki hver muni hreppa hnossið. Almenningur hafi alla vega komið sér í gott lið með sterkum fjárfestum þannig að líkurnar séu meiri en minni á að hann verði valinn. Jafet segir að það hafi komið sér á óvart hversu margir hafi boðið í Símann. Almennt hafi menn talið að hóparnir yrðu 7-8 en þeir hafi reynst 14 sem bendi til þess að í hópnum séu 6-7 erlendir aðilar.