2 ára bið eftir niðurstöðu nefndar

Fyrrverandi hluthafar í Baugi, sem ekki sættu sig við það verð sem þeir fengu fyrir bréf sín við þvingaða yfirtöku, hafa mátt bíða í um tvö ár eftir niðurstöðu matsnefndar í málinu. Málið, sem snýst um nokkra einstaklinga og fáein prósentustig í Baugi, hefur nánst tekið jafn langan tíma og rannsókn efnahagsbrotadeildar Ríkislögreglustjóra á félaginu. Þegar hlutabréf í Baugi fóru af markaði fyrir um þremur árum vegna yfirtökuskyldu sem þá myndaðist, var hluthöfum greitt út á hæsta gengi síðustu sex mánaða þar á undan. Langflestir hluthafanna seldu en eftir stóðu nokkrir sem ekki sættu sig við þetta. Þá var farið í innlausn bréfa þeirra eða þvingaða yfirtöku. Enn þrengdist hópurinn og eftir stóð Sparisjóður Mýrarsýslu, Sundagarðar hf. og þrettán einstaklingar sem kærðu. Héraðsdómur Reykjavíkur skipaði matsmenn í desember árið 2003. Þeirra hlutverk var að meta raunverulegt verðmæti Baugs og þá eignahlut þeirra sem kærðu. Það verð sem þeir ákveða nær síðan til allra sem voru beittir innlausnarákvæði. Fyrir Sparisjóð Mýrarsýslu, sem átti 911 þúsund hluti í Baugi, og Sundagarða hf., sem átti 4.833.000 hluti, gæti verið um verulegar upphæðir að ræða. En auk þeirra eru þrettán einstaklingar sem áttu mismikið, allt niður í um 2000 hluti. Matsmenn héldu fund í júní 2004 en síðan þá hefur ekkert frá þeim heyrst, að sögn lögmanns eins úr hluthafahópnum. Hann segir að sá tími sem nefndin hafi tekið sér sé kominn fram yfir öll eðlilegt mörk. Ýmsir velta því fyrir sér við hvaða tímabil matsmenn ætli að miða og búast má við að sú niðurstaða verði athyglisverð í ljósi útrásar fyrirtækisins í Bretlandi. Ekki náðist í matsmennina í dag.