Sterlingmenn úr stjórninni

Pálmi Haraldsson, Jóhannes Kristinsson og Almar Þór Hilmarsson sögðu sig í gær úr stjórn flugfélagsins Iceland Express. Í stjórn félagsins settust í þeirra stað lögmennirnir Einar Þór Sverrisson, Gunnar Jónsson og Hörður Felixson. Jafnframt var tekin ákvörðun um það að fela fyrirtækjasviði KB banka að selja fyrirtækið.

Eigendur fyrirtækisins voru jafnframt eigendur Sterling sem FL Group hefur eignast. Eigendur Sterling munu ef að líkum lætur bætast í hóp FL Group og því eru þessi skil gerð við Iceland Express. Viðsnúningur hefur orðið í rekstri Iceland Express og er það að sögn forráðamanna þess rekið með hagnaði.