Gullgrafaraæði grípur um sig í FlyMe

Það rignir inn tilboðum frá einstaklingum, segir verðbréfamiðlari um sænska lággjaldaflugfélagið FlyMe en íslenskir fjárfestar, smáir sem stórir, hafa streymt inn í félagið að undanförnu samkvæmt upplýsingum Markaðarins.

Hlutabréf í FlyMe, sem er að fimmtungshluta í eigu Pálma Haraldssonar og Jóhannesar Kristinssonar í Fons, hafa hækkað hratt frá áramótum en þau eru skráð á Nya Marknaden í Stokkhólmi. Þannig hækkaði gengið um 100 prósent á mánudaginn og yfir helming í síðustu viku, meðal annars vegna væntinga um mikinn vöxt félagsins á þessu ári og viðsnúnings í rekstri. Ummæli norsks stjórnarmanns í FlyMe höfðu einnig mikil áhrif en hann sagði að bréfin gætu hækkað um 500 prósent á árinu.

Gengishækkunin hefur laðað að fjárfesta sem ætla að verða ríkir á skömmum tíma og virðist vera mikill áhugi meðal fjárfesta að elta Pálma eftir Sterling-ævintýrið og fjárfestingar í Bretlandi. Pálmi og Jóhannes í Fons eru ekki einir um það að vekja hrifningu íslenskra fjárfesta. Íslendingar hafa gjarnan elt íslensk fyrirtæki í útrásinni, til dæmis Carnegie, easyJet, Finnair, Geest og Singer&Friedlander og auðvitað deCode.

En miklar sveiflur á gengi FlyMe valda mörgum heilabrotum, ekki síst þar sem tveggja milljarða hlutafjárútboð fer brátt í hönd og virðist engin skilja upp né niður í því. Á mánudaginn lækkaði gengi FlyMe úr 37 sænskum aurum í tólf þegar lokað var fyrir kauprétt í útboðinu. Með réttu hefði gengið átt að lækka niður í sex aura og þess vegna tvöfaldaðist verðmæti félagsins á einum degi. Markaðsvirði FlyMe er um átta milljarðar króna. 

Hlutafjárútboðið verður með því fyrirkomulagi að hlutaféð verður aukið margfalt og gefst hluthöfum kostur á að kaupa tíu hluti fyrir hvern einn, eldri hlut, á genginu þrír aurar. Kaupréttur miðast við hlutafjáreign í dag en þeir sem hafa keypt undanfarna tvo daga fá ekki kauprétt þar sem að tvo virka viðskiptadaga tekur að uppfæra hluthafaskrána. Margir hafa því keypt köttinn í sekknum og sjá fram á að hlutur þeirra verði þynntur um 91 prósent að loknu útboði en þeir sem seldu undanfarna tvo daga virðast halda í kaupréttinn.

Þar sem hlutabréf í FlyMe eru aurabréf (pennystock) geta orðið miklar sveiflur á genginu. Þegar bréf hækka úr 10 aurum í 15 aura hækka þau um helming. Eigendur FlyMe ætla að breyta verði bréfanna þegar útboðinu lýkur en þá verður farið í öfuga jöfnun þannig að 100 hlutir breytast í einn. Þar með fer markaðsgengi upp fyrir eina króna sænska og ætti að fara í tólf sænskar krónur ef gengi mánudagsins helst óbreytt.