FlyMe óskar eftir þrettán milljörðum Nýtt hlutafé nýtt til kaupa á öðrum flugfélögum.

Stjórnendur sænska lággjaldaflugfélagsins FlyMe ætla að leggja það til við hluthafa að hlutafé félagsins verði aukið um þrettán milljarða króna. Tillagan verður lögð fyrir á hluthafafundi í lok mánaðarins.

Fyrirkomulag útboðsins verður með sama hætti og fyrr á árinu þegar FlyMe safnaði 2,7 milljörðum króna í nýtt hlutafé. Fyrir hvern hlut sem hluthafi í FlyMe á, fær hann að kaupa tíu nýja hluti á genginu 1,3. Síðasta gengi FlyMe var 2,60.

Stærsti hluthafinn í FlyMe er Fons, félag Pálma Haraldssonar og Jóhannesar Kristinssonar.

Áður hefur komið fram að stjórnendur FlyMe eiga í viðræðum við nokkur evrópsk lággjaldafélög um yfirtöku, þar á meðal Sterling og FlyNordic. Segir forstjórinn Fredrik Skanselid í viðtali við Dagens Industri að hann reikni með því að flugfélagið kaupi eitt til tvö þeirra.