Skrefi nær yfirtöku

Tryggingamiðstöðin er skrefi nær yfirtöku á norska tryggingafélaginu NEMI forsikring ASA en Fjármálaeftirlit Noregs veitti TM fyrir helgi heimild til að eiga milli 74,5 og 100 prósent af útistandandi hlutum í félaginu. Þann 12. apríl síðastliðinn gerði Tryggingamiðstöðin öllum hluthöfum félagsins yfirtökutilboð með fyrirvara um samþykki samkeppnisyfirvalda og áreiðanleikakönnunar.

Heimild Samkeppniseftir­litsins er því háð að TM kaupi að minnsta kosti 74,5 prósent hlutafjár í NEMI innan þriggja mánaða frá dagsetningu samþykkisins. Jafnframt eru sett skilyrði fyrir því að leita þurfi samþykkis fyrir ráðstöfun umtalsverðra eigna eða hluta starfsemi NEMI til þriðja aðila og að möguleg viðskipti milli NEMI og TM fari fram eins og um óskylda aðila sé að ræða.

Í tilkynningu TM til Kauphallar Íslands segir að þetta þýði að skilyrði í tilboðinu um jákvæða umfjöllun norskra fjármálayfirvalda hefur verið rutt úr vegi. Eina óuppfyllta skilyrði tilboðsins sé nú að NEMI standist áreiðanleikakönnun. Áætlað er að henni ljúki ekki síðar en 25. ágúst.