Icelandair Group skráð í Kauphöll fyrir árslok

FL Group stefnir að því að skrá Icelandair Group í Kauphöll Íslands fyrir árslok. Heildarvirði Icelandair er 43 milljarðar króna og áætla stjórnendur FL að söluhagnaður félagsins verði 26 milljarðar króna.

FL og Glitnir hafa gert með sér samkomulag með þeim hætti að Glitnir sölutryggir um 51 prósent hlutafjár í kjölfar áreiðanleikakönnunar sem lýkur um miðjan október. Þá hverfur Icelandair úr samstæðu FL. Samkvæmt upplýsingum Markaðarins mun Glitnir vera með fjárfestahópa til taks en þetta mun vera eitt stærsta fyrirtækjaverkefni sem bankinn hefur ráðist í.

Markmiðið með skráningunni er það að fá breiðan hóp fjárfesta til liðs við Icelandair með sölu hlutafjár til þeirra, þannig að því komi fagfjárfestar, almenningur og ekki síst starfsmenn og stjórnendur. Gangi áform eftir um sölu hlutabréfanna verður hámarkshlutur FL 49 prósent í Icelandair en að sögn Hannesar Smárasonar, forstjóra FL, kemur til greina að hluturinn minnki umtalsvert eða jafnvel hverfi.

Hannes segir að það sé æskilegt að þetta mikil­væga samgöngutæki þjóðarinnar verði í eigu landsmanna og þetta er niðurstaðan eftir viðræður við fjárfesta að undanförnu. Hún er jafnframt í anda þeirrar yfirlýsingar frá því í febrúar um að koma Icelandair í eigu almennings. "Það er svo ekkert eitt sem hægt er að tiltaka í þeim efnum annað en það að við vorum að horfa til þess að hámarka okkar eigin arðsemi sem er okkar hlutverk. Að sama skapi að búa til umhverfi fyrir félagið þannig að það geti vaxið og dafnað."

Forstjórinn vill ekki tjá sig um hvers vegna hefði slitnað upp úr viðræðum FL við KB banka fyrir hönd Kers. Félagið greini ekki opinberlega frá efnisatriði einstakra viðræðna, til dæmis verðhugmyndum. Hann telur að verðlagning og aðferðafræði með fyrirhugaðri skráningu séu ásættanleg fyrir núverandi hluthafa og fjárfesta.

Bjarni Ármannsson, forstjóri Glitnis, segir að bankinn sé að taka að sér spennandi verkefni. "Við erum mjög sannfærð um að það er mikill áhugi fjárfesta og við höfum fundið það á félaginu. Það hefur ekki síst komið fram í umfjöllun í fjölmiðlum að undanförnu."