Óvinafagnaður sett í salt

„Þetta var bara samningur milli mín og kvikmyndamiðstöðvarinnar að myndin skyldi vera tekin út að þessu sinni og þannig rýmt fyrir aðrar," segir Friðrik Þór Friðriksson kvikmyndaleikstjóri.

Á nýlegum lista yfir stöðu styrktra verkefna hjá Kvikmyndamiðstöð Íslands er kvikmyndina Óvinafagnað hvergi að finna sem þó hefur verið þar síðastliðin þrjú ár og þá með vilyrði fyrir framleiðslustyrk upp á sjötíu milljónir undanfarin tvö ár.

Kvikmyndin er byggð á Íslendingasögunum og er feikilega dýr í framleiðslu en Friðrik sagði kostnaðaráætlunina hljóma upp á rúma tvo milljarða íslenskra króna. „Vandamálið liggur í fjármagninu, að fá þá peninga sem vantar inn í verkefnið," útskýrir Friðrik sem var hins vegar hvergi af baki dottinn, sagði uppi hugmyndir um að gera ódýrari útgáfu til að sýna fjárfestum að vel væri hægt að framkvæma þetta ógnarstóra verkefni.

Friðrik gengur hins vegar ekki óstyrktur frá borði því kvikmyndin S.A.S. fær vilyrði fyrir framleiðslustyrk upp á 55 milljónir en hún er gerð eftir handriti þeirra Arnaldar Indriðasonar og Óskars Jónassonar sem auk þess leikstýrir myndinni. Baltasar Kormákur leikur aðalhlutverkið og reiknaði framleiðandinn Friðrik með að vinna við gerð myndarinnar hæfist á næstu misserum.