FL Group kaupir Dreamliner farþegaþotur

FL Group hefur samið um kaup á tveimur Boeing 787-8 Dreamliner farþegaþotum fyrir hönd Icelandair Group. Flugvélarnar verða afhentar vorið 2012, en tveimur árum fyrr, eða á árinu 2010 fær Icelandair afhentar tvær fyrstu Boeing 787 breiðþoturnar sem pantaðar voru fyrir rúmu ári.

Í tilkynningu frá fyrirtækinu segir að Icelandair, dótturfélag Icelandair Group, muni nýta vélarnar til að þróa áfram leiðakerfi sitt og endurnýja flugflotann. Félagið á möguleika á að nýta sér kauprétt á þremur Boeing 787 flugvélum til viðbótar. Heildarverðmæti flugvélanna tveggja er um 290 milljónir Bandaríkjadala, eða um 21 milljarðar íslenskra króna, samkvæmt verðskrá.

Jafnframt hefur verið samið við Rolls Royce um Trents 1000 hreyfla fyrir Boeing 787 flota félagsins.

Boeing 787 flugvélin hefur vakið mikla athygli í flugheiminum að undanförnu fyrir tækniþróun og nýjungar. Alls hafa 28 flugfélög pantað 345 flugvélar af þessari tegund og er hún vinsælasta nýsmíði í sögu Boeing, að því er fram kemur í tilkynningunni. Vélarnar taka 200 til 300 farþega og henta á allt að 16.000 kílómetra vegalengdum. Þá notar Boeing 787 20 prósentum minna eldsneyti en sambærilegar farþegaþotur auk þess sem hægt verður að bjóða 45 prósentum meira vörurými en flugvélar af sambærilegri stærð gera í dag. Farþegarýmið verður gjörólíkt því sem nú tíðkast, gluggar verða mun stærri, sæti og gangar verða breiðari, rakastig verður hærra og margt fleira gerir það að verkum að upplifun farþegans af fluginu verður mun ánægjulegri, að því er segir í tilkynningunni.