Alfesca hagnaðist um 524.000 evrur

Hagnaður Alfesca nam 524.000 evrum, rétt rúmlega 48,1 milljón íslenskra króna, á fyrstu þremur mánuðum ársins. Tekjur námu 126,6 milljón evrum en það er 11,4 prósent aukning frá sama tíma fyrir ári. Þá nam hagnaður á fyrstu níu mánuðum fjárhagsársins 2005-2006 samtals 12,6 milljón evrum en sala á sama tímabili nam 475,7 milljón evrum, sem er 7,6 prósenta aukningu frá sama tíma í fyrra. 

Rekstrarafkoma Alfesca er góð og heldur félagið áfram að styrkja stöðu sína þrátt fyrir erfiðar markaðsaðstæður, að því er fram kemur í tilkynningu frá fyrirtækinu til Kauphallar Íslands. Þar segir m.a. að framhald hafi verið á góðri afkomu Lyons Seafoods í Bretlandi. Sala Farne í Skotlandi var góð á þriðja ársfjórðungi og afkoman batni enn vegna bættrar framleiðni í kjölfar fjáfestinga undanfarinna missera. Þá segir ennfremur að markaðshlutdeild í Frakklandi hafi aukist um 32 prósent en lokið hafi verið við fyrsta áfanga fullkominnar verksmiðju fyrirtækisins þar í landi. Þá sýnist sem áhyggjur af fuglaflensu hafi ekki haft áhrif á sölu andaafurða.

Haft er eftir Jakobi Sigurðssyni, forstjóra Alfesca, að félagið sýni trausta afkomu í erfiðu viðskiptaumhverfi og sé hún yfir áætlunum fyrirtækisins. „Hins vegar er ljóst að rekstrarumhverfi á yfirstandandi ársfjórðungi verður erfitt í ljósi þess að hráefnisverð er í sögulegu hámarki. Hins vegar munum við áfram takast á við hærra hráefnisverð af sömu festu og á undangengnum ársfjórðungum. Félagið mun áfram njóta góðs af framleiðniaukningu og kostnaðareftirliti sem leggur grunninn að bættum rekstri. Þessi grundvöllur starfseminnar ásamt vöruþróun og áætlun um frekari vöxt rennir styrkum stoðum undir rekstur félagsins," segir Jakob í tilkynningunni.