Bauer mætir sterkur til leiks

Fyrstu fjórar klukkustundirnar í sjötta sólarhringnum í lífi hryðjuverkamannabanans Jack Bauer eru sýndar í tveimur tvöföldum þáttum í bandarísku sjónvarpi á sunnudags- og mánudagskvöld. The New York Times birti gagnrýni um þessa fjóra 24-þætti fyrir helgi og miðað við þann dóm er óhætt að segja að nýja þáttaröðin lofi góðu.

Sólarhringurinn hefst á því að hópur sjálfsmorðssprengjuárásarmanna sprengja upp strætisvagna og neðanjarðarlestir víðs vegar um Bandaríkin. Í framhaldinu kemur í ljós að mikil ógn vofir yfir landinu og það er því ekki annað til ráða en að fá Jack Bauer til þess að skakka leikinn. Þegar skilið var við Bauer í lok fimmtu þáttaraðar var hann á leið í kínverskt fangelsi en bandarísk yfirvöld fá hann lausan gegn háu gjaldi og hann tekur til óspilltra málanna.

Gagnrýnandi blaðsins segir þættina enn halda góðum dampi og þeir séu merkilega ferskir. Þessir fjóra þætti bendi jafnvel til þess að nýja serían verði sú besta hingað til. Jack er þó ekki í toppformi sjálfur, er laskaður eftir illa meðferð í Kína og er fullur efasemda um að hann sé starfi sínu vaxinn. Hann þarf í ofanálag að þola kunnuglegt skilningsleysi æðstu stjórnenda, sem virðast seint ætla að læra að taka mark á hugboðum hetjunnar.

Íslenskir aðdáendur Bauers þurfa svo ekki að bíða lengi eftir að fá að njóta samvista við kappann en sýningar á 24 hefjast á Stöð 2 í lok janúar.