Brynhildur líklega í Lordi-myndinni

„Þetta var ein skemmtilegasta áheyrnarprufa sem ég hef verið með,“ segir Alexía Björg Jóhannesdóttir hjá Reykjavík Casting en hún sá um að prófa leikkonur fyrir finnsk/íslensku hryllingsmyndina Dark Floors: Lordi Motion Picture. Eins og fram kom í Fréttablaðinu fyrir skömmu verður íslensk leikkona í aðalhlutverkinu en meðframleiðendur myndarinnar eru þeir Júlíus Kemp og Ingvar Þórðarson hjá Kvikmyndafélagi Íslands.

„Þær komu hingað og öskruðu úr sér lungun og samstarfsfólk mitt hélt að ég væri hreinlega að reyna að drepa þær,“ bætir hún við. Alexía vildi ekki gefa upp hversu margar leikkonur kæmu til greina fyrir hlutverkið en samkvæmt heimildum Fréttablaðsins hlutu níu leikkonur náð fyrir augum Alexíu en sex þeirra koma hvað sterkast til greina.

Meðal þeirra eru þær Laufey Elíasdóttir sem sló í gegn í Blóðböndum, Ingibjörg Stefánsdóttir, Birna Hafstein og Haldóra Malin auk Caroline Dalton. Samkvæmt upplýsingum Fréttablaðsins er þó helst veðjað á að Brynhildur Guðjónsdóttir hreppi hnossið en hún þótti fara á kostum í prufunum. Þá er myndin leikin á ensku en Brynhildur lærði sín fræði í Bretlandi og þykir mikil tungumálamanneskja.

Dark Floors verður mikil auglýsing fyrir þá leikkonu sem verður valin en hún verður fyrst kynnt á Cannes-kvikmyndahátíðinni í maí. Þá verður hún markaðssett eins og háttur hefur verið á með Hollywood-kvikmyndir en samkvæmt kvikmyndavefnum imdb.com er ráðgert að hún verði jólamyndin í Finnlandi. Tökur fara fram í heimabæ finnsku skrímslasveitarinnar, Oulu. Íbúar bæjarins bíða spenntir eftir að fá þessa bestu syni bæjarins í heimsókn til sín og ætla að stjana við aðkomumennina.