Baksviðs í Cannes

Kvikmyndahátíðin í Cannes er svo sannarlega hátíð fagfólksins. Fáir eru hins vegar uppátækjasamari en einmitt fólkið í kvikmyndabransanum, og því gerist ýmislegt á bak við tjöldin, á lystisnekkjum og á ströndinni. Hjartaknúsararnir úr Hollywood halda sínu striki þó í Suður-Frakklandi séu.

Íslandsvinurinn Jude Law er iðinn við kolann hvar sem hann er staddur í heiminum. Hann lét sig ekki vanta í Playboy-partí sem haldið var í Cannes síðastliðið fimmtudagskvöld og mætti í fylgd söngvarans James Blunt. Félagarnir ræddu þó mest lítið saman í partíinu enda með báðar hendur fullar – af ljóshærðum Playboy-fyrirsætum. Law og Blunt sátu með tvær á mann í fanginu og gáfust fljótlega upp á að reyna að tala eitthvað saman.

Þeir yfirgáfu veisluna með nýju vinkonum sínum um fimm að morgni. Til hjarta- og fyrirsætuknúsarans Jude Law sást þar sem hann steig inn í lyftu á hóteli sínu ásamt lagskonum sínum tveimur.

Ef Playboy-fyrirsæturnar missa áhugann á leikaranum breska ætti hann að geta fundið hugarró í örmum Jessicu Simpson. Söngkonan bandaríska staðfesti á föstudag að hún væri hætt með John Mayer. Hún var þó ekki lengi að festa augun á mögulegum arftaka Mayers.

Simpson hitti Law í fyrsta sinn í Cannes á dögunum, og sagði fundinn hafa verið „losta við fyrstu sýn“. Söngkonunni þykir hreimur Law gera útslagið. „Ég elska hvernig hann talar. Breski hreimurinn hans og hvernig hann hreyfir munninn er svo æsandi,“ sagði hún.

Leonardo DiCaprio er ekki heldur sestur í helgan stein hvað varðar kvenkynið. Miðað við fréttaflutning frá Cannes virðist samband hans og ísraelsku fyrirsætunnar Bar Rafaeli vera liðin tíð. Til stjörnunnar hefur sést með lítt þekkta leikkonu, Dayu Fernandez, upp á arminn. Parið skellti sér líka í siglingu á snekkju DiCaprios í Cannes.

Vinir leikarans segja parið vera óaðskiljanlegt. Þau hafi þekkst í mörg ár, en aldrei náð saman þar sem að DiCaprio hafi iðulega verið á pikkföstu. Hvorki DiCaprio né Bar Rafaeli hafa gefið út yfirlýsingu um að þau séu hætt saman. Rafaeli hefur þó verið ein síns liðs á hátíðinni, og mætti til að mynda einsömul á frumsýningu myndarinnar A Mighty Heart á mánudaginn.