Frábær endasprettur hjá Birgi - lék á 72 höggum

Birgir Leifur Hafþórsson, atvinnukylfingur úr GKG, byrjaði ill á lokahringnum á Open de Saint-Omer mótinu í Frakklandi í dag, en sýndi mikinn styrk með því að snúa því við þegar leið á hringinn. Hann fékk fjóra skolla á fyrstu fimm holunum. Síðan setti hann í fluggírinn og fékk þrjá fugla í röð og var því kominn á einn yfir eftir 9 holur. Hann fékk síðan skolla á 10. holu og paraði síðan næstu sjö holur og lauk leik með því að setja niður fugl á lokaholunni og lék því hringinn á 72 höggum, eða einu yfir pari.

Birgir Leifur lauk leik á samtals 288 höggum (70-74-72-72), eða 4 höggum yfir pari og er í 28.-30. sæti sem stendur. Hann mun ekki geta færst aftar því þeir sem voru á lakara skori en hann hafa þegar lokið leik. Búast má við að Birgir Leifur færist aðeins ofar eftir því sem líður á daginn.

Ef Birgir endar í kringum 25. sæti þá fær hann um 5.000 evrur í verðlaun, eða 450 þúsund krónur. Fyrir mótið var hann í 155. sæti á peningalistanum og ef að líkum lætur mun hann hækka sig um 5-6 sæti á peningalistanum með þessum árangri í Frakklandi.

Spánverjinn Carl Suneson, sem lék á 70 höggum í gær, er efstur á samtals 6 höggum undir pari, en hann hefur leikið fyrri níu holurnar í dag á pari.



Kylfingur.is