Þeir sem gagnrýna mig eru fastir í trúboðanum

Max Mosley, forseti Alþjóða Akstursíþróttasambandsins, var opinskár í viðtali við ítalska blaðið Gazzetta dello Sport í dag.

Forsetanum voru á dögunum dæmdar tæpar 10 milljónir króna í miskabætur eftir að breska blaðið News of the World birti myndir og myndband af honum í kynlífsleikjum.

Mosley talaði opinskátt um reynslu sína í samtali við ítalska blaðið í dag og er á þeirri skoðun að fólk eigi að fá að njóta friðhelgi einkalífsins.

"Einu sinni voru samkynhneigðir og klæðskiptingar gagnrýndir á Englandi, en í dag má fólk gera hvað sem það vill í einkalífinu svo fremi sem það er ekki að særa neinn. Þeir sem gagnrýna mig eru menn sem stunda kynlíf ekki öðruvísi en í trúboðastellingunni. Það er hinsvegar hægt að stunda kynlíf með öðrum hætti og þeir sem gagnrýna mig hafa engan rétt á því," sagði Mosley.

Konan ekki kát

Forsetinn viðurkennir að hann hafi ekki verið í náðinni hjá konu sinni eftir að upp komst um sprell hans með vændiskonunum og segir málið hafa fengið mjög á fjölskylduna.

"Við höfum verið saman í 50 ár. Auðvitað var hún ekki ánægð með þetta. Hún varð reyndar mjög reið, en við ætlum ekki að skilja. Þetta hefur ekki verið skemmtilegur tími. Allt sem fram kom í blaðagreininni var satt nema hlutinn um nasistaorgíuna. Þetta var neyðarlegt fyrir fjölskylduna og hugsið ykkur bara hvað þið hefðuð hugsað ef faðir ykkar hefði lent í sömu aðstöðu," sagði Mosley.

Sökudólgurinn fundinn

Hann vill ekki meina að atvikið hafi skaðað ímynd Formúlu 1 og segist vera búinn að finna út hver það var sem kom á hann sök í málinu.

"Ég á ekki von á að ímynd Formúu 1 hafi skaðast vegna þessa máls og ég hef ekki frétt af því að stuðningsaðilar hafi dregið sig út úr samningum. Þegar ég heyrði lygarnar um nasista-tenginguna varð ég reiður og langaði strax að berjast fyrir rétti mínum. Þið munið fljótlega komast að því hver kom á mig sök," sagði forsetinn.