Sólþurrkaðir tómatar, pestó og svartar ólífur

Katrín Rós Baldursdóttir líffræðingur er af mörgum sögð vera meistarakokkur. Ímyndunarafl Katrínar í eldhúsinu er óendanlegt og hefur hún borið á borð hvern frábæran réttinn á fætur öðrum. Katrín Rós lumar á fjölmörgum uppskriftum að girnilegum kjúklingaréttum úr kjúklingabringum og eina uppskrift, sem hefur verið í miklu uppáhaldi, fékk hún hjá vinkonu sinni.

„Úr kjúklingi er hægt að gera svo marga bragðgóða og frábæra rétti. Ég luma á tugum uppskrifta þar sem kjúklingabringur eru í aðalhlutverki. Uppskriftirnar sem ég hef sankað að mér í gegnum tíðina koma héðan og þaðan og það eru alltaf nýjar að bætast við í safnið,“ segir Katrín.

Ein af uppáhaldsuppskriftum Katrínar er afar einföld og tekur alls ekki langan tíma. Það sem þarf í réttinn er fjórar kjúklingabringur, rautt pestó, sólþurrkaðir tómatar, svartar ólífur, ein og hálf dós af rjómaosti með sólþurrkuðum tómötum, einn piparostur og þrír fjórðu úr pela af matreiðslurjóma. Í sósuna fer ein dós af rjómaostinum, hálfur piparostur og matreiðslurjóminn.

„Aðferðin er fljótleg og góð en byrjað er á því að kljúfa bringurnar í tvennt þannig að tvær þunnar sneiðar verði úr hverri bringu. Bringurnar eru síðan penslaðar með pestóinu. Á aðra hlið bringnanna er sett ein teskeið af rjómaosti, sólþurrkaðir tómatar og ólífur. Þegar þetta er komið er bringunum rúllað upp og þær festar saman með tannstönglum. Sósunni er hellt í eldfast mót og bringunum er svo raðað í mótið og bakaðar við 180 til 200 gráður í ofni,“ útskýrir Katrín.

Með bringunum er gott að bera fram salat með vínberjum, tómötum, rauðlauk og feta-osti. Einnig er mjög gott að sögn Katrínar að hafa með kartöflubáta sem eru búnir til þannig að kartöflurnar eru skornar í tvennt langsum og síðan skorið í þær „rúðumynstur“.

Kartöflurnar eru svo penslaðar með olíu sem hefur verið blönduð með kjöt- og grillkryddi. Hafa þarf í huga að kartöflurnar þurfa klukkutíma inni í ofni við 180-200 gráður.