Hamilton baunar á Alonso

Lewis Hamilton sendi fyrrum félaga sínum Fernando Alonso hjá McLaren litla pillu í viðtali í dag þegar hann var spurður út í samband sitt við Spánverjann.

"Hann sýndi mér nákvæmlega hvernig maður á ekki að haga sér sem ökumaður í Formúlu 1," sagði Hamilton. "Hann ætlaði sér leiðtogahlutverk í liðinu í byrjun en það breyttist fljótt. Þetta á að snúast um liðið fyrst og fremst - allir eiga að vera jafnir," sagði Hamilton.

Deilur þeirra Alonso og Hamilton settu svip sinn á McLaren liðið á síðasta keppnistímabili og strax í Japanskappakstrinum í september sagði Hamilton að sér þætti ólíklegt að þeir gætu starfað saman áfram hjá liðinu.

Þessum deilum lauk svo með því að Alonso sneri aftur til Renault þar sem hann varð tvöfaldur heimsmeistari, en McLaren réði til sín Finnann Heikki Kovalainen.

Hamilton segist ekki kæra sig um að fá neina sérmeðferð frá McLaren þó hann teljist stærra nafnið af ökumönnunum tveimur hjá liðinu.

"Ég vil ekki að annar okkar fái sérmeðferð heldur á þetta að snúast um liðið og allir eiga að vera jafnir. Þannig kann ég best við það og ég vil að Heikki fái nákvæmlega sömu tækifæri og ég," sagði hinn 22 ára gamli Breti.