Kaupþing flutti 90 milljarða kr. frá Mön til London fyrir hrunið

Forstjóri fjármálaeftirlitsins á Mön segir að skömmu fyrir hrun íslensku bankanna hafi Kaupþing flutt 550 milljónir punda eða rúmlega 90 milljarða kr.úr útibúi sínu á eyjunni og yfir til London. Þetta gerðist skömmu fyrir hrun íslensku bankanna og frystingu eigna þeirra á Bretlandi í kjölfarið.

Þetta kom fram í máli forstjórans, John Aspden, í vitnaleiðslur fyrir þingnefnd þeirri á breska þinginu sem nú rannsakar orsakir bankakreppunnar þar í landi.

Aspden segir að fjármálaeftirlit Manar hafi haft miklar áhyggjur af stöðu Kaupþings og Singer & Friedlander þegar í mars á síðasta ári. Hann segir að þá þegar hafi embætti hans reynt að draga úr áhættu bankans af Íslandi og hafi hann óskað leiðsagnar í málinu frá breska fjármálaeftirlitinu (FSA) næstu tvo mánuðina.

Fram kemur í máli Aspden að fjármálaeftirlit Manar hafi samþykkt á endanum að fyrrgreind 550 milljón pund yrðu flutt til London þar sem þeir hafi verið fullvissaðir um að það væri í lagi af FSA. Taldi FSA að féið væri öruggari ef það væri geymt í London.

Þessi upphæð, 550 milljónir punda, voru um helmingur eigna Singer & Friedlander á Mön. Upphæðin fraus svo inni í London í október í kjölfar aðgerða breskra stjórnvalda gegn íslensku bönkunum.

Á Mön sitja svo um 8.000 eyjaskeggjar, sem áttu innlánsreikninga í Singer & Friedlander, með sárt ennið þar sem bresk stjórnvöld hafa neitað að tryggja innistæður þeirra. Þær eru taldar nema rúmlega 800 milljónum punda.