Annar sigur KR-kvenna í röð - hefndu fyrir tap í fyrri umferðinni

KR vann 3-0 sigur á Aftureldingu/Fjölni í fyrsta leik fimmtándu umferðar Pepsi-deildar kvenna á KR-velli í kvöld. KR var 2-0 yfir í hálfleik.

KR-liðið náði þar með að hefna fyrir 3-1 tap á móti Aftureldingu/Fjölni í fyrri leiknum en þjálfari sameiginlegs liðs Aftureldingar og Fjölnis er Guðrún Jóna Kristjánsdóttir sem er leikjahæst hjá KR frá upphafi í efstu deild.

Lilja Dögg Valþórsdóttir, Sonja Björk Jóhannsdóttir og Dagmar Mýrdal Gunnarsdóttir skoruðu mörk KR í kvöld en Sonja hefur þar með skorað fjögur mörk í síðustu tveimur leikjum en KR hefur leikið án Hrefnu Huldar Jóhannesdóttur í þeim.

Þetta var annar sigurleikur KR-liðsins í röð en KR vann 7-0 sigur á Keflavík í leiknum á undan. KR er eftir leikinn áfram í 6. sæti deildarinnar nú þremur stigum á eftir Fylki sem er í 5. sætinu.