Hrefna kominn aftur í KR en Lilja Dögg verður fyrirliði

Hrefna Huld Jóhannesdóttir mun spila með KR í Pespi-deild kvenna í sumar en hún er búinn að semja við KR eftir að hafa hætt hjá Stjörnunni eftir stutta dvöl í Garðabænum.

Hrefna Huld var fyrirliði bikarmeistara KR á síðasta tímabili og markahæsti leikmaður liðsins með 19 mörk. Hún hefur alls skorað 139 mörk í 162 leikjum í efstu deild kvenna.

Hrefna mun ekki taka við fyrirliðabandinu að nýju því þjálfarnir Kristrún Lilja Daðadóttir og Íris Björk Eysteinsdóttir hafa gefið það út að Lilja Dögg Valþórsdóttir verði fyrirliði KR-liðsins í sumar.

Á heimasíðu KR kemur fram að vonast sé til að Hrefna verði með KR á móti Val í Meistarakeppni KSÍ en hún fer fram í Kórnum í kvöld. Leikurinn hefst klukkan 18.15.