Ólafur Darri í sjósund og köfun fyrir Djúpið

„Ég hef ekki stundað sjósund sem sport en hef þurft að synda ansi mikið í sjónum að undanförnu," segir Ólafur Darri Ólafsson leikari sem er byrjaður að undirbúa sig fyrir aðalhlutverkið í nýrri kvikmynd Baltasars Kormáks, Djúpið.

Myndin er lauslega byggð á ótrúlegu afreki Guðlaugs Friðþórssonar sem synti í land eftir að bát hans hvolfdi skammt frá Heimaey með þeim afleiðingum að fjórir félagar Guðlaugs fórust. Ólafur leikur aðalhlutverkið og þarf því að vera ansi vanur köldum sjónum enda má fastlega reikna með því að myndin gerist að mestu leyti á hafi úti.

„Ég var náttúrlega svolítið í sjónum í Brúðgumanum og svo líka í Roklandi þannig að maður er kominn með smá grunn."

Ólafur hyggst ekki fara til sjálfskipaðra sjósundsfræðinga til að undirbúa sig fyrir sund í köldu vatni. „Nei, ég ætla bara að fara í góðra vina hópi og hlakka bara mikið til að henda mér í sjóinn," segir Ólafur en hann hyggst þó leita ráða hjá Stefáni Mána Sigþórssyni rithöfundi sem hefur tekið ófá sundtök í köldum sjónum.

En sjósundið er ekki eini undir­búningurinn sem Ólafur Darri hyggst henda sér út í því hann hefur skráð sig á köfunarnámskeið. „Ég hef aldrei kafað og ætlaði reyndar að fara á svona námskeið síðasta haust. En það kemur sér vel að gera þetta núna og fyrst maður er að fara að leika í þessari bíómynd er bara eins gott að láta slag standa," segir Ólafur. - fgg