Saumaði 40 kjóla á fjórum dögum

Ása Ninna Pétursdóttir fatahönnunarnemi var fengin til að hanna nýja kjóla á Jórukórinn frá Selfossi. Ása Ninna flutti nýverið heim eftir tveggja ára dvöl í Danmörku og bauðst henni að taka að sér verkefnið stuttu eftir heimkomuna.

„Einn kórmeðlimurinn hafði eitt sinn keypt kjól af mér og hún bauð mér verkefnið. Mér fannst þetta mjög spennandi og ákvað að slá til. Ég vildi ekki gera hefðbundna kjóla á þær heldur ákvað að gera kjóla sem innblásnir voru af páfuglunum sem ég hafði séð í Tívolíinu í Kaupmannahöfn þannig að kjólarnir eru mjög skrautlegir," útskýrir Ása Ninna.

Verkefnið tók um fimm vikur og að sögn Ásu Ninnu gekk það vel þótt það hafi verið strembið. „Konurnar í kórnum eru eins og gefur að skilja á öllum aldri og í öllum stærðum og gerðum þannig að ég þurfti að sníða kjóla í ýmsum stærðum. Ég var ein um sníðagerð og saumaskapinn nema síðustu þrjá dagana, þá fékk ég aðstoð saumakonu við að falda og ganga frá. Þannig að þetta var pínu púl en gekk upp fyrir rest."

Ása Ninna lenti þó í svolitlum hremmingum þar sem efnið sem sauma átti kjólana úr tafðist á leiðinni til landsins og kom aðeins fjórum dögum fyrir skiladag. „Ég fékk það á mánudegi og átti að afhenda kjólana á fimmtudegi þannig að ég stóð á haus síðustu dagana. Þetta gekk þó á endanum."

Ása Ninna heldur áfram með hönnunarnám sitt við Listaháskóla Íslands í haust en í sumar hyggst hún nýta tímann til að hanna barna- og herralínu undir heitinu Pardus, en hún hefur áður hannað flíkur á konur undir sama nafni. „Ég ætla að reyna að vera dugleg að vinna í mínu eigin í sumar og reyna að koma mér á framfæri," segir Ása Ninna að lokum. - sm