Kristín Ýr: Ofhugsum hlutina í seinni hálfleik

Kristín Ýr Bjarndóttir markaskorari Vals í 1-0 sigrinum á Aftureldingu var ánægð með að vera komin í bikarúrslitaleikinn. Þrátt fyrir markið sagðist hún ekki hafa verið á skotskónum.

„Já, þetta er skemmtilegasti leikur ársins. Við ætluðum þangað allan tímann."

Kristín Ýr skoraði sigurmarkið í fyrri hálfleik og tryggði Valskonum sæti í undanúrslitum annað árið í röð. Í fyrra skoraði hún reyndar þrennu í undanúrslitum.

„Já, ég hefði nú getað skorað fleiri ef ég hefði verið á skotskónum. En þetta var ágætt."

Margir vildu meina að Valskonur ættu þægilegt verkefni fyrir höndum gegn Mosfellingum. Skyldusigur jafnvel.

„Nei, alls ekki. Á þessu ári eru engir leikir þannig. Öll lið eru miklu betri en hafa verið, búin að kaupa leikmenn og styrkja sig. Það eru engir skyldusigrar í þessu lengur," sagði Kristín Ýr.

Kristín Ýr segir kvennaboltann sterkari en hann hefur verið.

„Það er komið mikið af góðum leikmönnum að utan auk þessara gömlu góðu sem eru íslenskir. Þannig að þetta hefur styrkst heilan helling. Allir leikir mikið jafnari og skemmtilegri," Kristín Ýr.

Valskonur höfðu góð tök á leiknum í fyrri hálfleik. Í þeim síðari var ekki ljóst hvort Mosfellingar hefðu gefið í eða Valskonar slakað á klónni.

„Bæði og. Þær voru að spila öðruvísi, lásu okkur kannski betur en fyrr í leiknum. Við erum stundum betri í fyrri hálfleik en dettum í flóknari hluti í síðari hálfleik. Gerum allt voða einfalt og vel í fyrri hálfleik en ofhugsum svo allt í seinni hálfleik. Í stað þess að sparka í boltann og hlaupa þá ætlum við að gera allt rétt. Dettum stundum í það," sagði Kristín Ýr.