Pála Marie: Ekki reikna með stórsigri

Pála Marie Einarsdóttir, leikmaður Vals, segir Valsstelpur ætla með bikarinn á Hlíðarenda, þar sem hann á heima. Hún segir stemmninguna í liðinu góða.

„Hún er rosagóð. Það hlakka allir til þess að spila. Það er alltaf jafngaman að koma hingað og spila bikarúrslitaleik."

Pála Marie hefur bæði verið í sigurliði og tapliði í bikarúrslitaleik og á því misjafnar minningar frá Laugardalsvelli.

„Ég held í þessar góðu og reyni að gleyma þeim sem þarf að gleyma. En það er bikar í góðu og auðvitað ætlum við heim með hann."

Pála lítur ekki á leikinn sem möguleika á að hefna fyrir úrslitaleikinn árið 2008 þegar KR gjörsigraði Val 4-0.

„Nei, bæði lið eru mjög breytt þannig að það er ekki alveg hægt að bera þetta saman."

Valskonur gáfu út fyrir tímabilið að liðið stefndi á að vinna tvöfalt. Nú virðist Íslandsmeistaratitillinn genginn þeim úr greipum og bikarinn hugsanlega leið til þess að bjarga sumrinu.

„Já, hinn er nánast kominn í Garðabæinn en þessi er ennþá í Reykjavík og við ætlum að skella honum á Hlíðarenda, þar sem hann á að vera."

Flestir reikna með sigri Valskvenna á laugardag og jafnvel stórsigri.

„Nei, ég myndi ekki reikna með honum. Við ætlum að sjálfsögðu að vinna þennan leik en KR er með gott lið og það er ekkert gefið í bikarúrslitum."

Pála er með einfalda uppskrift að sigri í leiknum.

„Við ætlum að verjast vel og skora fleiri mörk en þær. Það virkar oftast til þess að vinna leiki."