Laxveiðisumarið 2011: Haffjarðará og Selá gáfu mest

Veiðisumrinu lauk formlega á mánudaginn þegar veiði í Ytri-Rangá var hætt. Þar komu flestir laxar á land eða alls 4.961. Næst flestir laxar veiddust í Eystri-Rangá. Í Haffjarðará og Selá veiddust hins vegar flestir laxar á stöng. Veiðin í Elliðaánum var líka mjög góð.

Þrátt fyrir töluverða svartsýni meðal veiðimanna í byrjun laxveiðisumars­ins rættist vel úr því þegar á leið. Landssamband veiðifélaga tekur árlega saman veiðitölur og gáfu þær 25 laxveiðiár sem félagið notar til viðmiðunar um laxveiði hvers árs alls 35.848 lax í ár. Er þetta betri veiði en árið 2006 en lakari en árin 2007 til 2010.

Þorsteinn Þorsteinsson, frá Skálpastöðum í Lundarreykjadal, heldur utan um veiðitölur fyrir Landssambandið. Hann bendir á að þróunin í laxveiði sé alltaf mjög sveiflukennd.

„Laxveiðin síðustu ár hefur verið alveg ótrúlega góð og það skekkir mat manna á því hvað er gott laxveiðiár. Veiðimenn eru orðnir mjög góðu vanir," segir Þorsteinn. „Það verður hins vegar að játast að þetta byrjaði nú frekar dauflega. Laxinn kom seinna en hann hefur gert en miðhluti sumarsins var þó þokkalega góður víðast hvar."

Afar slakt í Laxá í Dölum

Þorsteinn segir haustveiðina hafa verið heldur minni en hann hafi vonast eftir.

„Þar kann að spila inn í að veiðin í hafbeitaránum, eins og til dæmis Rangánum, var minni. Svo virðist sem sleppiseiði hafi ekki skilað sér eins vel úr sjó og undanfarin ár. Reyndar á þetta ekki bara við um sleppiseiðin heldur líka villta laxinn. Málið er hins vegar að endurheimtur sleppiseiða hafa mikið að segja þegar horft er á heildarveiði í stórum ám eins og Rangánum. Síðan er auðvitað undantekning í þessu eins og öllu og það er Breiðdalsáin sem setur nýtt met en þar veiddust 1.430 laxar samanborið við 1.178 í fyrra."

Þorsteinn segir ástandið í sjónum ráða miklu um endurheimtur laxa í ár.

„Ef endurheimtur sjógönguseiða hækka úr tveimur prósentum í þrjú þá gefur augaleið að það þýðir gríðarlega mikla aukningu í göngum. Það geta verið ýmsar ástæður fyrir því að endurheimtur séu lakar. Það þarf ekki annað en að átugöngur í sjó og ganga seiðanna falli ekki saman."

Þorsteinn segir að víðast hvar á landinu hafi laxveiði verið alveg þokkaleg. Helst virðist sem ár á Vesturlandi hafi átt erfitt uppdráttar og þá vegna lélegs vatnsbúskapar. Ágætt dæmi um það sé Laxá í Dölum en þar veiddust 568 laxar samanborið við 1.762 í fyrra.

Veiðin í Borgarfirðinum var hins vegar með ágætum. Þorsteinn segir að þó veiðin í Norðurá hafi ekki verið jafngóð og síðustu þrjú ár verði að hafa það í huga að fyrir svona eins og átta árum hefði hún þótt alveg frábær. Þá beri að geta þess að veiði í Straumunum og Brennunni í Hvítá hafi verið mjög góð.

Góð veiði í Stóru-Laxá og Soginu

Þorsteinn segir að besti mælikvarðinn á veiði sé hversu margir laxar séu veiddir á hverja stöng. Í þeim efnum hafi Veiðimálastofnun talið að 100 laxar á stöng væri þokkalegt viðmið. Á gröfunum hér fyrir ofan má sjá að fjöldi áa er með yfir 100 laxa á stöng en einnig eru nokkrar undir því viðmiði. Hafa verður í huga að þetta viðmið á þó ekki við allar ár enda löngum ljóst að til dæmis veiðimenn sem fara í Laxá í Aðaldal eru ekki að sækjast eftir því að veiða marga laxa heldur að ná þeim stóra. Á Nessvæðinu í Laxá í Aðaldal var hlutfall stórlaxa 86 prósent og í júlí var meðalþyngdin í kringum 17 pund.

Á Suðurlandi var veiði í Stóru-Laxá mjög góð en þar veiddust 795 laxar sem er met. Erfitt er að fá heildartölur úr Soginu þar sem það skiptist í mörg svæði. Á svæðum Stangaveiðifélags Reykjavíkur í Soginu veiddust ríflega 750 laxar og hefur veiðin þar einungis einu sinni áður verið betri. Skógá, Affallið og Kerlingardalsá fóru heldur halloka og segir Þorsteinn að þó það hafi ekkert verið rannsakað sé freistandi að halda því fram að þar hafi vikur vegna eldgosa haft þónokkur áhrif á lífríki ánna.

Á Norðausturlandi var veiði með miklum ágætum. Met var sett í Svalbarðsá en þar veiddust 563 laxar og var hlutfall stórlaxa mjög hátt. Þó Fnjóskáin hafi dalað frá því í fyrra var veiðin í sumar sú næstbesta síðan árið 2005.

trausti@frettabladid.is