Breyttar reglur á viðisvæðum Strengja

Hér er frétt af vef Strengja: "Þetta var erfitt rjúpnaveiðitímabil fyrir austan, megnið af tímanum ekki snjókorn að sjá og nánast vorblíða flesta dagana. En það bjargaði mörgum veiðimanninum á okkar vegum nýju svæðin á Jökuldalsheiðinni sem við tókum á leigu, Ármótasel og Arnórsstaðir, en þar sýnist mér að hafi fengist allavega um 300 rjúpur þetta haustið".

En veiðileyfasalan fyrir árið 2012 er komin á fullan skrið og hvet ég bæði  fasta viðskiptavini Strengja og aðra að hafa samband sem fyrst því áhuginn er mikill eftir gott sumar í flestum okkar ám. Ekki verður komist hjá einhverjum hækkunum en flestar eru þær miðaðar við almennar  verðlagsþróun nema þar sem kostnaður vegna stóraukinna seiðasleppinga þarf að koma fram í verði veiðileyfa til umframhækkunar. Þó er óhætt að segja að miðað við þær tölur sem heyrast í  „bransanum“  í nokkrum ám þessa dagana eru árnar okkar mjög hóflega verðlagðar! Og „bestu kaupin á eyrinni“ eru eflaust hið nýja Jöklusvæði okkar miðað við veiddan lax á stöng á dag.

Hlutfall veiddra og slepptra laxa í Breiðdalsá og Jöklusvæðinu var tæplega  50% sumarið 2011. Þó var megnið af aflanum stórlax og undantekningarlaust var einnig nánast allur smálax drepin þó menn hittu jafnvel á mokveiði ef þeir voru heppnir. Ég hef aldrei verið talsmaður þess að eingöngu veiða og sleppa eða hafa kvóta á laxi, en nú verður ekki undan komist að herða reglur fyrir 2012 í þessum ám.  Sleppiskylda verður á öllum 70cm laxi og stærri og kvóti tveir laxar á stöng á dag sem má hirða af smálaxi. Og í Steinboganum í Jöklu og ofar í Jökuldal verður sleppiskylda á öllum laxi enda vannýtt uppeldiskilyrði þar fyrir náttúruleg laxaseiði og vantar meiri hrygningu þar. Maðkur verður bannaður í Breiðdalsá en áfram leyfilegur í september á Jöklusvæðinu. Spónveiði verður áfram leyfð í september í báðum ám enda ekki vandamál að sleppa spónveiddum laxi aftur í flestum tilfellum. Í Hrútafjarðará verður engin kvóti, en sleppiskylda á stórlaxi, en áður hafði verið mælst til að sleppa honum".

Birt með góðfúslegu leyfi Strengja