Hlakka til að hitta nemendurna

Förðunarskólinn Beautyworld hefur verið settur á laggirnar og mun kenna á snyrtivörurnar frá Bobbi Brown. Hugmyndafræðin á bak við vörurnar er sú að hver kona geti litið út eins og hún sé með lýtalausa húð, noti hún réttan farða.

Eygló Ólöf Birgisdóttir er skólastjóri hins nýja skóla og segist hún hafa fengið fjölda fyrirspurna um hvar sé hægt að læra förðun í gegnum starf sitt sem förðunarfræðingur og því hafi hún ákveðið að stofna skólann í samstarfi við Guðrúnu Möller.

„Við bjóðum upp á 14 vikna námskeið þar sem grunnurinn í förðun er kenndur ásamt „airbrush"-tækni og kvikmyndaförðun," útskýrir Eygló, sem hlakkar mikið til að hitta tilvonandi nemendur skólans.

Aðspurð segir hún næga vinnu að hafa innan þessa geira enda sé mikill uppgangur í ýmiss konar kvikmynda- og þáttagerð hér heima.

„Þetta er mjög skemmtilegt starf. Ég fór sjálf út í þetta fyrir fimm árum því mig langaði að læra að farða sjálfa mig. Málin þróuðust svo þannig að ég hef nánast verið í fullu starfi við þetta frá því að ég útskrifaðist," segir Eygló glaðlega.

Skólinn hefst 7. febrúar og má fá nánari upplýsingar í síma 510-8080. - sm