Sléttunarmeðferð sem endist í nokkra mánuði

Krullhærðir vita að það getur farið illa með þurrt og hrokkið hár að slétta það.

Natura Keratin er ný byltingarkennd stofumeðferð sem sléttar hár án þess að taka hárböndin í sundur og virkar fyrir hið krullaðasta hár sem og allar hárgerðir og dugir í þrjá til fimm mánuði.

Nokkrar hárgreiðslustofur hafa tekið þessa meðferð upp og þeirra á meðal er Salon Reykjavík á Grandagarði, en Keratin Islandia er umboðsaðili Natura Keratin.

„Ólíkt því sem sléttunaraðferðir geta jafnan gert, að taka hárböndin í sundur og setja þau aftur saman, gerir meðferðin þveröfuga hluti fyrir hárið," segir Arnar Tómasson hjá Salon Reykjavík.

 „Hún gerir það mjúkt, slétt og sterkara með hjálp fljótandi keratíns sem festist utan um hvert einasta hár og myndar þannig verndarhjúp.“

Arnar segir meðferðina vera afar vinsæla vestanhafs, í Bandaríkjunum sem og í Brasilíu.

Meðferðin getur tekið allt frá einni og hálfri upp í fimm klukkustundir.

Keratín er sett í hvern einasta lokk, hárið þurrkað með efninu í og hver einasti lokkur hitaður með sléttujárni til að festa keratínið utan á hárinu.

Síðan má ekki þvo hárið næstu þrjá daga á eftir.

„Sléttunarmeðferðin kemur sérstaklega vel út fyrir þá sem eru með þurrt, opið og slitið hár, þar sést mestur munur.

Einnig gefur meðferðin fyllingu þannig að hárið hangir ekki lint niður. Þeir sem vilja svo fá liðina öðru hverju fram geta það vel, því meðferðin tekur liðina ekki alveg í burtu.

Það þarf að fara aðeins yfir með sléttujárninu á hverjum degi til að fá það alveg slétt," segir Arnar.

Kostinn við meðferðina segir Arnar meðal annars vera að engin rót kemur, líkt og í permanetti, heldur dofnar efnið smám saman úr hárinu.

Meðferðin endist lengur hjá meðhöndluðu hári en efnameðhöndluðu.

„Það sem helst þarf að passa upp á eftir meðferð er að forðast sjampó með ákveðnum efnum í, súlfötum og natríumklóríði, en þessi efni leysa keratínið of hratt upp."

juliam@frettabladid.is