Ágúst vill að liðið spili enn hraðari bolta

Íslenska kvennalandsliðið í handknattleik sigraði Tékkland í tvígang um helgina en leikirnir voru hluti af undirbúningi liðsins fyrir heimsmeistaramótið í Brasilíu sem hefst í lok þessara viku. Ágúst Þór Jóhannsson, landsliðsþjálfari Íslands, er nokkuð bjartsýnn á framhaldið.

„Varnarleikur liðsins var nokkuð góður í leikjum gegn Tékkum og ég var ánægður með það,“ sagði Ágúst.

„Sóknarleikur okkar er á köflum mjög góður, en þegar stelpurnar eru ekki einbeittar þá föllum við niður á nokkuð dapurt plan sóknarlega. Þegar út í mótið er komið þá megum við ekki fá svona ódýr mörk á okkur úr hraðaupphlaupum, en það gerðist of oft á móti Tékklandi. Ég hef reynt að breyta leikstíl liðsins og vill að stelpurnar keyri hraðann enn meira upp. Slíkt bíður aftur á móti upp á fleiri tæknifeila en það er hlutur sem við verðum að vinna bug á“.

Íslenska liðið heldur til London á morgun þar sem lokaundirbúningur liðsins fyrir heimsmeistaramótið í Brasilíu fer fram, en liðið mætir Bretlandi í óopinberum æfingaleik.

„Leikurinn gegn Bretum verður bara léttur æfingaleikur þar sem við ætlum að rúlla liðinu vel og æfa ákveðin atriði. Við ætlum okkur til að mynda að æfa okkur vel að vera einum færri í leiknum og þetta verður nokkuð frjálslegur leikur. Stelpurnar eru í fínu standi og enginn alvarleg meiðsli í hópnum“.

Stelpurnar hefja leik á heimsmeistaramótinu í Brasilíu 3. desember gegn Svartfjallalandi, en auk þeirra mætir liðið Angóla, Noregi, Kína og Þýskalandi og því er þetta ærið verkefni fyrir stelpurnar okkar.

„Það er ljóst að við erum í mjög sterkum riðli. Þýskaland, Noregur og Svartfjallaland eru frábærar þjóðir en við verðum að sigra Angóla og Kína til að eiga möguleika. Við ætlum samt sem áður bara að taka einn leik fyrir í einu og undirbúa liðið fyrir hvern andstæðing“.