Hörgá: Ógleymanlegt augnablik

Það má með sanni segja að Guðrún Kristófersdóttir hafi náð að fanga augnablikið þegar hún náði stórbrotinni ljósmynd af stökkvandi sjóbleikju á svæði 5a í Hörgá fyrir skemmstu. Veiðivísir fékk góðfúslegt leyfi til að birta myndina sem sýnir margt af því besta við að standa á bakka veiðivatns á Íslandi.

Á heimasíðu SVAK segir að sjóbleikjan í Hörgá sækir langt uppá dal til að hrygna og hún þarf að yfirstíga ýmsar hindranir á leið sinni þangað. Fossinn fyrir ofan Bægisárhyl er t.d ekki alltaf greiðfær og þess vegna safnast oft mikið af bleikju í Bægisárhylnum sjálfum, en hann er einn af vinsælastu veiðistöðum í ánni.

Kynþroska sjóbleikja fer að ganga í Hörgá í júlí og þær sem ganga lengst fram í dalina koma fyrstar en bleikjan hrygnir annars um alla á. Þegar líður á sumarið fara göngur vaxandi og ná hámarki í ágúst. Algeng þyngd kynþroska sjóbleikju er um 1-2 pund en þær þyngstu eru um 6 pund. Bleikjan gengur langt fram fyrir Bakkasel í Öxnadal, að Básfossi í Hörgárdal og að Byrgisfossi í Myrká sem er neðstur þriggja fossa í mynni Myrkárdals. Í lok ágúst og frameftir hausti gengur ókynþroska smábleikja í Hörgá, oft í stórum torfum.

Fyrr á árum voru gerðar tilraunir til þess að rækta upp laxastofn í Hörgá en þær skiluðu ekki árangri. Einungis örfáir laxar veiðast á hverju ári. Fiskrækt hefur ekki verið stunduð í áratugi en reynt er að stemma stigu við sel, mink og veiðiþjófum með veiðum og eftirliti í samstarfi við sveitarfélögin. Eftir stendur að áin er ein sú besta þegar kemur að silungsveiði.

Hér má finna afburða góðar upplýsingar um veiðisvæðið, náttúrufar og veiðileyfi á heimasíðu Stangveiðifélags Akureyrar.



svavar@frettabladid.is