Einstök hellableikja við Mývatn

Rannsókn á hellableikju við Mývatn stendur nú yfir en verkefnið þykir einstakt á heimsvísu þar sem fylgst er með þróun margra náttúrulegra stofna í einu. Þetta kom fram í kvöldfréttum RÚV í gær.

Tvö bleikjuafbrigði finnast í Mývatni en nú hefur þriðja afbrigðið, dvergvaxin bleikja, fundist í hraunhellum við vatnið. Svo virðist sem í hverjum helli hafi þróast sjálfstætt bleikjuafbrigði.

Bjarni Kristófer Kristjánsson, dósent við fiskeldis- og fiskalíffræðideild Háskólans á Hólum, sagði í samtali við RÚV að í hverjum þessara hella virðist vera erfðafræðilega nánast aðgreindur stofn af bleikju, sem hver sé mjög lítill.

Allir fiskar í tuttugu hellum verða merktir og fylgst verður með þeim í þrjú ár. Með rannsókninni vonast Bjarni Kristófer og samstarfsmenn hans meðal annars til þess að geta fundið út hvenær og hvernig bleikjan hafi komist í hellana og hvernig hún sé erfðafræðilega skyld bleikjunni í vatninu sem og innbyrðist.