92 sentimetra tröll í Affallinu

Ólafur Jón Arnbjörnsson, skólastjóri Fisktækniskólans, veiddi 92 sentimetra hæng í Affallinu í Landeyjum á sunnudaginn var. Fiskurinn er sá stærsti sem komið hefur úr ánni í sumar, svo vitað sé.



Ólafur var í sjö manna veiðihópi sem gerði víðreist um ána frá sunnudegi til þriðjudags. Ólafur var einn á stöng og krækti í ferlíkið rétt fyrir neðan veiðistað fimm. Það tók hann um tuttugu mínútur að landa tröllinu og var Ólafur að vonum ánægður með fenginn. Hængurinn tók túbu, einhverskonar sambland af rauðum frances og appelsínugulri snældu.



Veiðifélagar Ólafs fengu hver sinn fiskinn, þrjá laxa og þrjá sjóbirtinga, þeir stærstu um fimm pund. Ekki urðu veiðimenn varir við mikinn fisk í ánni en veðrið var heldur ekki það ákjósanlegasta, köld norðanátt og glaða sólskin. Ekki bætti svo úr skák að næturfrostið gerði vart við sig.