Stubbur á kodda

„Ég var búin að velta því lengi fyrir mér hvernig best væri að nálgast Stubb. Mig langaði að gera það af alúð enda hefur Stubbur fylgt íslenskum börnum kynslóð fram af kynslóð en bókin var fyrst gefin út 1947," segir Ragnhildur Anna en hún hefur unnið ver utan um svæfil með myndum úr sögunni um Stubb.

„Mig langaði að tengja bókina samveru og hvíld en sjaldan er meiri nánd eða kyrrð en þegar lesið er fyrir börn. Ég fékk góðfúslegt leyfi hjá Bókaútgáfunni Björk sem gefur út Stubb og útkoman varð gjafapakkning með veri, 40x45 sentimetrar að stærð, ásamt bókinni góðu," segir Ragnhildur.

Verin eru saumuð á Vinnustofunni Ási en þar eru einnig framleiddir gjafapokar utan um barnasamfellur fyrir Jónsdóttir & co.

„Þar sem oft er hvatt til að gefa börnum bækur á sumardaginn fyrsta langaði mig að hafa verkið tilbúið á þeim tíma. Það hefði hins vegar aldrei tekist nema vegna einstakrar samvinnu við Vinnustofuna Ás," segir Ragnhildur.

Gjafapakkningin með Stubbi er til sölu í Safnabúð Þjóðminjasafsins, Minju á Skólavörðustíg og gegnum heimasíðuna jonsdottir.is og nýlega bættist verslunin Sirka á Akureyri í hóp verslana sem selja vörur Ragnhildar.

„Reyndar gerði ég einnig stuttermabol með Stubbi því myndin af honum er svo falleg í einfaldleika sínum. Bolurinn er hins vegar eingöngu seldur hjá mér. Vinnan við Stubb var skemmtileg og það má vel vera að það verði framhald eftir vinnuna með Stubb og önnur yndisleg barnabókahetja bætist í safnið." -rat