Þjálfari Þórs/KA: Við vorum kærulausar og lélegar

ÍBV vann frábæran sigur á Þór/KA, 4-1, á Þórsvellinum í gær og varð því fyrsta liðið til að leggja topplið Þórs/KA að velli í sumar. Eyjastúlkur réðu lögum og lofum í leiknum og var sigurinn aldrei í hættu.

ÍBV komst upp í þriðja sætið með sigrinum og er aðeins einu stigi á eftir Þór/KA og Stjörnunni sem verma toppsætið saman.

„Við vorum bara svakalega kærulausar og alls ekki tilbúnar í þennan leik," sagði Jóhann Kristinn Gunnarsson, þjálfari Þórs/KA, í samtali við Fréttablaðið.

„Eyjaliðið er gríðarlega sterkt og við vissum alveg að þetta yrði erfiður leikur, þess vegna er ég virkilega svekktur hvernig við nálguðumst þennan leik. Ég vildi óska þess að sannleikurinn væri sá að ÍBV hefði komið okkur eitthvað á óvart en svo var ekki, við vorum einfaldlega lélegar."

Jóhann segir að með tapinu sé eitt af markmiðum liðsins fokið út um gluggann.

„Það var markmiðið að tapa ekki einum einasta leik á heimavelli á tímabilinu og því er þetta svekkjandi. Núna sést úr hverju liðið er gert og hvernig við ætlum okkur að svara þessu tapi. Við þurfum að sýna samheldni og karakter og þá hef ég engar áhyggjur. Það geta fimm lið unnið deildina í ár og þetta verður hörð barátta alveg fram í lokaumferðina," sagði Jóhann og bætir við að hans lið ætli ekki að gefa eftir.

„Ég held að ekkert lið eigi eftir að stinga af þar sem mörg lið eiga eftir að hirða stig hvort af öðru í sumar. Við ætlum okkur að vera í toppbaráttunni allt tímabilið og höfum alla burði til að landa þessum Íslandsmeistaratitli."