"Ég er ákaflega svekktur"

„Ég leyni því ekki að ég er ákaflega svekktur yfir þessari stöðu og ætla að leyfa mér að vera svekktur frameftir degi, segir Bjarni Júlíusson, formaður Stangaveiðifélags Reykjavíkur en Veiðifélag Norðurár hafnaði í gærkvöldi báðum tilboðum félagsins í veiðirétt árinnar.

„Svo hristum við þetta bara af okkur og höldum áfram á þeirri braut að vinna vel fyrir íslenska stangaveiðimenn. En óneitanlega veltir maður því fyrir sér hvernig veiðileyfasalar almennt munu taka í næstu útboð sem kunna að verða í þessum geira."

Tilboðin voru til umræðu á fundi Veiðifélags Norðurár, sem haldinn var á Bifröst í gærkvöldi. Veiðiréttareigendur við Norðurá eru 41. 32 voru mættir á fundinn og af þeim greiddu 28 atkvæði með því að hafna tilboðunum tveimur sem hljóðuðu annars vegar upp á 83,5 milljónir og hins vegar upp á 76,5 milljónir.

Teygðum okkur eins langt og við töldum gerlegt

Bjarni segir að niðurstaðan hafi komið á óvart. „Já, þessi niðurstaða kemur mér á óvart. Veiðifélagið bauð ána út með sínum skilmálum, við fórum í einu og öllu eftir þeim stífu kröfum og leikreglum sem þeir settu.

Við gerðum eins gott tilboð í Norðurá og við töldum okkur fært," segir Bjarni. „Við teygðum okkur eins langt og við töldum gerlegt, buðum í ána samkvæmt þeim forsendum sem settar voru. Við vorum þeir einu sem gerðum tilboð og það hlýtur að segja sína sögu."

Veiðimenn krefjast lækkana

Bjarni segist ekki gera sér grein fyrir því hver næstu skref verði hjá Veiðifélagi Norðurár. Hann útilokar samt ekki frekari viðræður.

„Auðvitað eiga menn alltaf að geta talað saman, sérstaklega ef þeir þekkjast vel og hafa starfað saman lengi. Nú er boltinn hjá Veiðifélagi Norðurár og hugmyndir okkar áttu greinilega ekki uppá pallborðið þannig að ég sé ekki alveg hvað við gætum lagt fram í slíkum viðræðum.

Ég hef talað við hundruð veiðimanna síðastliðna mánuði og skilaboðin frá þeim eru alveg skýr. Íslenskir veiðimenn munu ekki sætta sig við verðhækkanir, þeir krefjast lækkana. Ég sé það ekki breytast í bráð. Stangaveiðifélag Reykjavíkur vill reka ábyrga stefnu í verðlagsmálum veiðileyfa. Við erum með margar glæsilegar ár innan okkar vébanda og við munum einfaldlega rækta þann garð eins og við best getum."

trausti@frettabladid.is