Tímabilið búið hjá Birnu og Stella tæp

Birna Berg Haraldsdóttir er úr leik í úrslitakeppni N1-deildar kvenna en hún handarbrotnaði þegar að lið hennar, Fram, tapaði fyrir ÍBV í kvöld.

Staðan í undanúrslitarimmu liðanna er 2-1 fyrir Fram en Eyjastúlkur unnu eftir framlengdan leik í kvöld, eins og lesa má um hér fyrir neðan.

Stella Sigurðardóttir sneri sig einnig á ökkla í leiknum í kvöld og fór af velli í framlengingunni. Óvíst er hvort hún nái næsta leik en það kemur í ljós á næstu dögum.

Stella meiddist á þumalfingri í fyrsta leik liðanna í síðustu viku en þá tognaði hún illa auk þess sem blæddi inn á liðinn. Hún harkaði þó af sér og spilaði þar til hún meiddist aftur í kvöld.

Halldór Jóhann Sigfússon, þjálfari Fram, staðfesti við Vísi í kvöld að Birna Berg þyrfti að vera í gifsi næstu 4-6 vikurnar.