Á fimm metra háu reiðhjóli

Vekur mikla kátínu á árlegum hjólreiðadegi í Los Angeles.

Það er ekki á allra færi að halda jafnvægi á reiðhjóli sem er fimm metra hátt, en þó hefur einn greinilega næga reynslu til þess að hjóla dágóða vegalengd á þessu fáránlega hjóli. Síðustu helgi var árlegur hjóladagur haldinn í Los Angeles og þá er nokkrum götum lokað fyrir hjólreiðamenn. Það nýtti þessi lunkni ofurhugi , Richie Trimble sér og hjólaði meðal annarra venjulegra hjólreiðamanna.

Í meðfylgjandi myndskeiði sést sjónarhorn hans vel úr þessum háa söðli og sannast sagna verður hann fyrir vikið að teljast meðal ofurhuga, en fallið væri hátt úr hans söðli ef eitthvað færi úrskeiðis. Litlu má þó muna er hann fer undir næstum jafn háa brú og hjól hans er sem og þegar hann þverar óþægilega umsetna umferðargötu á leið sinni niður á strönd. Ekki einfaldar það málin að hjólið er bremsulaust.