Smálaxakenningin er ágætis óskhyggja

Smálaxakenning Dr. David Summers, yfirmanns veiðimála í Tay í Skotlandi, er ágætis óskhyggja en það á eftir að koma í ljós hvort hún stenst segir Guðni Guðbergsson, sviðsstjóri hjá Veiðimálastofnun.

Á Veiðivísi í gær var fjallað um aukna aprílveiði í ánni Tay. Þar kom fram að veiðin hefur nánast þrefaldast frá árinu á undan en líkt og á Íslandi brugðust göngur eins árs laxa í Tay í fyrra.

Dr. Summers telur að orsakasamband sé á milli lélegra smálaxaganga og góðrar vorveiði.

Dr. Summers leiðir líkum að því að vegna slæmra aðstæðna í sjónum við Bretlandseyjar fari eins árs laxinn nú lengra norður í leit að æti. Þetta gæti þýtt að „smálaxinn" þurfi að dvelja í sjónum í tvö ár áður en hann snúi til baka.

Yfirleitt langtímasveiflur

Í framhaldi af þessu hafði Veiðivísir samband við Guðna og óskaði eftir hans áliti á þessari kenningu, ef svo má nefna.

„Þessar upplýsingar eru reyndar ekki mikið til að byggja á hvað varðar beina líffræðilega þætti," segir Guðni. „Það eru þekktar breytingar á sjávaraldri laxa en yfirleitt er um að ræða langtímasveiflur en ekki miklar eða snöggar breytingar á milli ára. Hér á landi höfum við ekki séð miklar göngur laxa eftir tvö ár í sjó í kjölfar lítillar göngu laxa með eins árs sjávardvöl árið á undan. Hinsvegar eru tengsl á milli stærðar laxa og fjölda og svo á milli fjölda laxa eftir eitt ár í sjó og laxa með tveggja ára sjávardvöl."

Það má alltaf halda í vonina

Guðni segir að samkvæmt þeim tölum sem hann hafi séð hafi orðið samdráttur í laxveiði í Skotlandi, eins og víðast annarsstaðar við Norður-Atlantshaf, í fyrra.

„Þar sem dánartala í sjó skiptir miklu varðandi göngur og veiði geta auknar heimtur nú gefið vísbendingar um betri skilyrði á beitarsvæðum í sjó en það er of snemmt að segja hvort þessi veiði í Tay gefi vísbendingar fyrir Ísland. En það má alltaf halda í vonina."

trausti@frettabladid.is