Porsche Macan tilbúinn í nóvember

Nýjasti bíll Porsche er jepplingurinn Macan, sem er á stærð við Audi Q5. Hann verður fyrst kynntur almenningi á bílasýningunni í Los Angeles í nóvember. Margir hafa haft af því áhyggjur að bíllinn verði að miklu leiti eins og Audi Q5 og sömu íhlutir muni verða í þeim báðum, þar sem bæði fyrirtækin tilheyra Volkswagen samstæðunni. Macan verður hinsvegar með aðrar vélar, fjöðrun og innréttingu svo eitthvað sé nefnt. Ekki er hægt að segja annað en Macan svipi mjög til stærra bróður, Cayenne. Hann er í raun eins og smækkuð útgáfa hans og er þar ekki leiðum að líkjast.

Porsche hefur gefið upp hvað bíllinn mun kosta, en í Bretlandi má gera ráð fyrir því að kaupverð hans verði 36.000 pund. Það er 6,7 milljónir króna en gera má þó ráð fyrir hærri tölu hérlendis vegna hárra gjalda. Ef að líkum lætur verður um vandaðan jeppling að ræða því Porsche hefur ekki hingað til látið frá sér bíl sem ekki er mikið lagt í og svarar flestum kröfuhörðum neytendum.