Seldi bíl og stal honum aftur

Átján ára Kaliforníumær fann þennan líka fína Honda Civic af árgerð 2009 á 10.000 dollara og keypti hann af Jose nokkrum Madrigal. Hún ók honum stolt fyrir utan heimili sitt í Palm Springs, en þegar hún ætlaði að njóta hans daginn eftir var hann horfinn.

Þjófurinn var enginn annar en seljandinn, sem greinilega hefur haldið eftir lykli af bílnum og vissi hvar hann yrði að finna. Að auki var eigendaskiptavottorðið sem fylgdi bílnum ólöglegt.

Hún fór til lögreglunnar og tilkynnti þjófnaðinn. Lögreglan brá á það ráð að hringja í þjófinn og falast eftir bílnum til kaups. Mælti hún sér mót við hinn bíræfna þjóf við almenningsgarð. Madrigal sendi spúsu til verksins og var hún handtekin á staðnum, enda var hún með í ráðagerðinni allri.

Lögreglan hélt síðan að heimili þjófaparsins, en þá lagði Madrigal á flótta á öðrum bíl sem komst ekki lengra en að næstu götu vegna bilunar og var fljótt færður í járn. Því sitja þau bæði inni sem stendur og verða kærð fyrir þjófnaðinn