Ben Stiller og Russel Crowe hittust á Íslandi

Ben Stiller hitti Russel Crowe fyrir tilviljun á Reykjavíkurflugvelli á dögunum. Þetta kemur fram á vefsíðu kvikmyndatímaritsins The Empire.  Í nýjasta hefti blaðsins er fjallað ítarlega um Íslandsdvöl Stillers, en þar tók hann upp myndina The Secret Life of Walter Mitty í fyrrasumar.

Samkvæmt Empire voru ekki mikil orðaskipti á milli þeirra félaga á flugvellinum, en Crowe þótti greinilega mikið til mikið til íslensks veðurfars koma. „Þú verður að ráða yfir veðrinu,“ á hann að hafa sagt við Ben Stiller. Stiller kippti sér aftur á móti ekki upp við veðrið og sagði í viðtalinu að hann hafi þurft að eiga við ýmiskonar aðstæður í leikstjórastólnum.

Crowe hafði verið á landinu í svipuðum tilgangi, en hann leikur stórt hlutverk í stórmyndinni um Örkina hans Nóa, sem var tekinn upp að hluta til á Íslandi. Þá var Tom Cruise á landinu skömmu áður, þar sem hann stóð í tökum á kvikmyndinni Oblivion. Má því segja að innrás Hollywoodleikara til landsins hafi byrjað um þetta leyti, en nú flykkjast stórstjörnur úr kvikmyndaheiminum til landsins í stórum stíl.

The Secret Life of Walter Mitty verður frumsýnd í desember á þessu ári.