Ekkert aktu taktu gluggaskytterí

Hreindýraveiðar ganga treglega og hefur til að mynda Pálmi Gestsson leikari, þaulvanur veiðimaður, verið á hreindýraslóð og leitað dýra í nokkra daga án árangurs. Aðeins er búið að veiða 300 dýr af 1229 dýra kvóta.

Erfiðlega gengur að finna dýr á hreindýraslóð. Pálmi gerir hann út frá Vaðbrekku í Hrafnkelsdal og nýtur leiðsagnar Sigurðar Aðalsteinssonar, eða Sigga á Vaðbrekku, sem hokinn er af reynslu við hreindýraveiðar. En, þrátt fyrir mikla leit hefur gengið illa að finna dýr. Pálmi, sem hefur fellt hátt í tíu tarfa í gegnum tíðina, gefur lítið fyrir það að lítið sé fyrir þessu haft. Segir af og frá, þetta sem margur vill meina að þetta sé eins og að skjóta belju á túni.

Pálmi, sem er að veiða á svæði eitt og hefur þegar þetta er ritað verið við leit í fjóra daga, segir þetta agalegt ástand og ekkert finnist. Hefur meira að segja borið á því að menn hafi gefist upp og skilað inn leyfum sínum. „Já, við vorum að tala um það hérna. Menn kalla þetta aktu taktu og gluggaskytterí. En, það er ekki mín reynsla. Við löbbuðum 18 kílómetra í gær og vögguðum inn allar heiðar.“

Svæði eitt er víðfeðmt. „Maður þarf að fara niðrá Vopnafjörð og Bakkafjörð og þar. Þeir vita af svakalega mörgum dýrum sem ekkert hefur verið veitt úr. En þetta er svo erfitt svæði, erfitt aðgengi. Við erum þrjá tíma að rugga þarna inn heiðina.“

Jóhann G. Gunnarsson hjá umhverfisstofnun á Egilsstöðum segir það vissulega rétt að yfir stórt og erfitt svæði sé að fara og oft sé erfitt að finna dýr. Hann staðfestir það sem Pálmi segir, að dæmi séu um að menn hafi gefist upp og skilað inn leyfunum. Nú þegar tarfatímabilið um það bil hálfnað er búið veiða 300 dýr af 1229. Jóhann segir oft hafi útlit verið fyrir að kvótinn yrði ekki kláraður en alltaf hafi veiðarnar gengið eftir. Álag á veiðislóð eykst mjög eftir 20. ágúst en þá hefst gæsatímabilið og vilja margir veiðimenn samnýta ferðina austur og fara á gæs jafnframt.

...

Ofangreint var ritað á veiðisíðu Fréttablaðsins sem birtist í gær. Í úrdrætti sem birtist á forsíðu blaðsins var fyrir röð óskiljanlegra mistaka því haldið fram að Pálmi væri staddur á Jökulfjörðum en vitaskuld átti þar að standa Jökuldal. Er beðist velvirðingar á þessari sérkennilegu missögn.

Því er svo við það að bæta að Pálmi náði að fella dýr í gær, 108 kílóa tarf í Selárbotnum.