Sannleikurinn: Nýjustu heimskupör Bakkavararbræðra kostar þá 700 þúsund

DV vann í gær eitt af þeim átján hundruð meiðyrðarmálum sem menn tengdir viðskiptalífinu hafa höfðað gegn blaðinu en bræðurnir Ágúst og Lýður Guðmundssynir voru sendir heim með skottið á milli lappanna úr Héraðsdómi Reykjavíkur eftir tilraun sína til að þagga niður í blaðamönnum sem fjalla um milljarða viðskiptafléttur þeirra.

Bakkavarabræður héldu því fram að fréttastjóri DV hefði „kynnt undir andúð í garð þeirra vegna þátttöku í atvinnurekstri“ en Héraðsdómur komst að þeirri niðurstöðu að bræðurnir sjálfir hefðu skapað sér andúðina með milljarða arðgreiðslum til sín úr félagi sem afskrifa þurfti 22 milljarða hjá.

Var bræðrunum gert að greiða málskostnað DV, alls 700 þúsund krónur en þeir höfðu vonast til að geta með meiðyrðamálinu komið fjárhagslegu höggi á blaðið sem dregið hefði úr vilja þess til að fjalla um þá. Þekkt er að auðmenn reyni í gegnum dómstóla að vernda sig gegn neikvæðri umfjöllun, oft með því að ráðast á veski fjölmiðlafólks.

Þau ummæli sem Bakkabræður töldu ærumeiðandi voru eftirfarandi:

„Þetta voru peningar sem Bakkabræður höfðu fengið fyrir að selja þriðja bróðirinn, hann Helga í þrældóm til Indlands á árunum fyrir hrunið.“

„Bakkabræður halda hins vegar arðgreiðslum upp á milljarða sem þeir tóku út úr eignarhaldsfélaginu sem þarf að afskrifa 22 milljarða hjá.“

„Þetta eru leiðinlegustu bræður landsins síðan Halli og Laddi skemmtu saman.“

Fóru þeir fram á að Ingi Freyr og DV ehf, yrði dæmdir til að greiða þeim 800 þúsund krónur til að kosta birtingu dóms í málinu auk málskostnaðar en fengu það í hausinn aftur.



Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  sem fengið hefur mikið afskrifað.