Sannleikurinn: Viltu vinna miða á landsleikinn

Fréttastofa Sannleikans ætlar að gefa 10 heppnum stuðningsmönnum miða fyrir tvo á leik Íslands og Króatíu þann 15. nóvember sem fram fer á Laugardalsvellinum.

Um er að ræða stærsta knattspyrnuleik í sögu karlalandsliðs Íslands en liðið mætir Króötum tvívegis 15. og 19. nóvember í umspili um sæti á heimsmeistaramótinu í Brasilíu sem fram fer næsta sumar.

Það eina sem þú þarft að gera til að komast í pottinn og vinna miða er að niðurlægja sjálfan þig á Facebook. Það getur þú gert með því að deila Facebook síðu Sannleikans eins og óþolandi vinningahóran sem þú ert. Gefa síðan upp símanúmerið þitt hér í kommentakerfinu sem við seljum til þriðja aðila og loks breyta prófílmyndinni þinni á Facebook í rollu sem nautheimsk eltir hjörðina en telur samt innst inni að hún sé sérstök.

Þú þarft svo bara að fylgjast vel með næsta áratuginn og sjá hvort þú ert ekki ein/n af þeim heppnu!





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en þar er oft hægt að verða heppinn.