Sannleikurinn: Vonar að pabbi verði ekki mikið fullur

Jón Óskar átta ára vonar að pabbi sinn verði ekki mikið fullur um þessi jól, minnugur hátíðarinnar í fyrra þar sem faðir hans var hundleiðinlegur og frekar mikill asni nánast allan tímann sem hann var á annað borð vakandi.

Tjáði Jón Óskar fréttastofu að hann væri ekki vongóður um að faðir sinn myndi geta hamið áfengisneyslu sína þessa hátíð frekar en aðra frídaga. Sérstaklega í ljósi þess að hann hefur þegar séð til hans bera allmarga poka merkta Vínbúðinni niður í geymslu þar sem fjölskyldan er með annan ísskáp sem faðir hans notar mikið fyrir bjór.

„Ég leyfi mér þó að vera bjartsýnn og vona að hann sofni snemma. Allavega áður en mamma og við förum að fara í taugarnar á honum,“ sagði Jón Óskar við fréttastofu.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu sem á ekki við vandamál að stríða.