Ben Affleck og Matt Damon saman á ný

Félagarnir Matt Damon og Ben Affleck koma saman á ný og verða meðal kynna á Golden Globe-hátíðinni sem fram fer um helgina í 71. sinn.

Lífið á Vísi mun tísta beint frá hátíðinni sem fer fram sunnudaginn.

Damon, ásamt því að kynna, er tilnefndur til verðlauna á hátíðinni sem besti leikari í míníseríu eða sjónvarpsmynd fyrir hlutverk sitt í Behind the Candelabra. Aðrir tilnefndir í sama flokki er samleikari hans úr Behind the Candelabra, Michael Douglas, Chiwetel Ejiofor, Idris Elba og Al Pacino. 

Affleck hlaut verðlaun sem besti leikstjóri hátíðarinnar í fyrra fyrir kvikmyndina Argo.

Affleck og Damon bætast þá við listann af kynnum hátíðarinnar, en fyrir skipuðu listann Jennifer Lawrence, Kevin Bacon, Tom Hanks, Mila Kunis og Robert Downey Jr. svo einhverjir séu nefndir.

Í janúar 1998 var Golden Globe-hátíðin haldin í 55. sinn, og þá fóru þeir félagar, Damon og Affleck, upp á svið til þess að taka við fyrstu stóru verðlaunum sínum í kvikmyndabransanum.

Tvíeykið vann til verðlauna fyrir besta handritið, kvikmyndina Good Will Hunting. Þeir unnu svo síðar til Óskarsverðlauna fyrir sama handrit.